Sa krigen de letters op de wenningen oan de Lange Miente yn Akkrum der noch in stikje skiednis by.
AKKRUM - Op in kâlde moarn yn oktober j.l., dêr’t de sinne noch mar krekt trochbriek oer de Lange Miente, begûn it ferhaal fan de letters Burgerzin en Eendracht.
Dizze letters, hast santich jier âld en eartiids fan glânzgjend koper, wiene net allinnich in stikje skiednis, mar ek in symboal fan mienskip en ferbûnens. Doe’t de sloop plannen foar de huzen oan de Lange Miente kamen, wie ik der gau by om te regeljen dat dizze bysûndere letters net ferlern gean soene. Mei de meiwurkers fan wenningbouferieniging Elkien spruts ik ôf dat se feilich op souder by de Doarpskeamer bewarre wurde soene, oant de nije huzen klear wiene.
Mar lykas it sprekwurd seit: “It giet net altyd sa’t men tinkt.” Op in dei, doe’t ik as foarsitter de Doarpskeamer (tsjinoer de sloop hûzen ) ynstapte, seach ik ta myn grutte skrik dat de letters ferdwûn wiene. Al gau kaam der in wiisprater mei in hint: de letters leine yn it buske fan in ûnderoannimmer, dy’t de nutsfoarsjennings ôfslute moast. Fluch socht ik dy man op, mar hy joech ta dat er de letters moai fûn foar by him thús en woe se net weromjaan. Ik hie gjin oare kar as fuort kontakt te sykjen mei Elkien, en nei wat hinne en wer bellen waard de ûnderoannimmer frege de letters werom te bringen.
Letter dy middei krige ik in berjocht: de letters wiene wer boppe wetter! Ik mocht de doaze mei letters ophelje yn it haltsje tusken de Doarpskeamer en de Skuorre. Wat wie ik blyd, mar dochs bleau der in nuver gefoel hingjen. Yn de skuorre helle ik de letters út de doaze, lei se op ’e tafel, en ta myn ferheardens ûntbruts de letter R fan ‘Burgerzin’. Fuort wer kontakt socht mei Elkien, mei in foto derby as bewiis. Dy letters wiene ommers net te ferfangen!
Oare moarns kaam der in appke mei in foto fan in muorke op de Lange Miente – dêr wie de ûntbrekkende R! Fluch derop ôf en gelokkich koe ik de R werom krije. Mei in grutte tank oan de man dy’t earst de letters meinommen hie, haw ik se wer kompleet makke. (De man dy’t letters efteroer druk hie, seach echt net fleurich.) “Wa’t blyn is foar syn skea, sjocht net oft er wat mist,” tink ik by mysels.
Ferline wike haw ik de folsleine set letters oerlange oan in meiwurker fan Elkien, mei it boadskip der goed op te passen. Sa bliuwt in stikje skiednis en mienskip behâlden, krekt lykas wy yn Fryslân graach dogge: “Elk syn gerak, mar de mienskip op it earste plak.”
De folsleine skiednis en de betsjutting en it ferhaal oer de letters is te lêzen yn it magazine fan Elkien of op de site www.elkien.nl
Aize Wijnstra
Lees ook
